L'angolo degli artisti

BORGO ROMA CIAMA

Ti che te stè de casa
o che te vivi a Tomba  
infórmate na s-cianta
su come va la vita
nel to Quartiere… antico.

Ghèto pensà par caso
có te si drio passare
co’ on po’ de baticore
davanti a l’ospedale
che ghè qua in Borgo Roma?
I vien da in capo al mondo
par farse ben curare
da esperti luminari…

No basta el parco verde,
de spesso frequentado,
par dire che sto borgo
l’è stà ben rinovado.

La porta de san Giacomo
ricorda i pori mati
che adesso i jè ’ndè fora
par ingrossar la fila
de i veronesi nati.

Le piere de i du Forti
el Tomba e ’l Caterina,
l’Esedra e le so mure
le ziga ancor de guera…
quela che le conbate
par no morir par senpre:
le speta de guarire
le piaghe de l’incuria.

Epur ghè brava gente
che no ghe dorme sora
pa’ i loghi da salvare:
esperti volontari
intanto i te conpagna
a visitar sti posti
che mèrita pi amore

Se gusta la natura
la storia, le so cese
de Tomba, de Tombeta
san Lazzaro, san Giacomo
l’antica Claudia Augusta,
parfin la Fossa Bova
siora de tante spece
de àlbari e de osèi.

Cussì se pol capire
che el posto indó se vive
l’è on ben da conservare
par ci ghe sta da ieri
o vegnarà on diman.

Se po’ dal canpanile
de Santa Teresina
una canpana sona,
ne vien da interogarse
su ci ghè drio morire.

Forsi l’è sto Quartiere
che l’è lì indrìo sofrire
spetando giuste cure.
Se na canpana sona
la dise che l’è ora
de darse on po’ da fare!

                      Lucia Beltrame Menini

 

Ingresso ex Ospedale Psichiatrico
Olio su tela di Paolo La Torre

MORAR, CARO MORAR!

Cargo a magio, pien de fruti
metà bianchi, metà mori,
quante robe te vol dire
ai studenti del liceo
che i te guarda e i passa via.

Ghera qua na tratorìa
“Carlo Sega e so mojer”
anca lori iè ’ndà via,
ma ti, tosto, te si qua
co’ i to rami a far onbrìa.

I to anéi iè scorza dura
de ci vol restar ancora
a contar la storia vera
de l’antica conpagnìa…
Co’ ’l careto i se fermava
par na tripa, on bianco… e via.

Borgo Roma de Verona
ga le corte sbandonà,
ma la gente resta bona,
te vol ben, l’è afezionà.
I vol farte on cortileto
’torno al tronco, de rispeto.

I te tien da monumento
vivo e vegeto… on portento;
métar po’ na targa in fero
scrìvar soto: so’ EL MORAR.
Alza pur la gresta, fiero:
te si ’l nostro… general!

                          Lucia Beltrame Menini